Þjónustan og markmið

Hegðunarerfiðleikar barna birtast á ýmsa vegu eins og til að mynda við að fylgja reglum, vinna verkefni og í vináttusamböndum. Þessi hegðun getur stafað af undirliggjandi orsökum eins og kvíða, námserfiðleikum, ADHD eða öðrum röskunum. Að vera foreldri sem horfir upp á barnið sitt eiga í erfiðleikum í skólaumhverfinu getur verið yfirþyrmandi og valdið álagi og mikilli streitu. Hins vegar er mikilvægt að gera sér grein fyrir því að þið eruð ekki ein; margar fjölskyldur standa frammi fyrir svipuðum áskorunum. Að viðurkenna erfiðleikana er fyrsta skrefið í átt að því að finna árangursríkan stuðning.

Eining sérfræðiþjónusta, fyrir foreldra skólabarna, Effs, veitir þjónustu um allt land. Þjónustan veitir foreldrum barna sem eiga við hegðunaráskoranir að stríða eða eiga erfitt uppdráttar í skóla, hvort sem greining liggur fyrir eða ekki, aðstoð við að greina þjónustuþarfir barnsins, náms- og félagslega. Út frá þarfagreiningu eru útbúnar gagnreyndar stuðningsáætlanir fyrir heimili og skóla. Einnig mæti ég á skólafundi með foreldrum óski þeir eftir því. Þar er lögð áhersla á að finna heildstæða lausn á erfiðleikum barnsins með hliðsjón af fyrirliggjandi þarfagreiningu og stuðningsáætlun ásamt sýn skólafulltrúa. Foreldrar hafa síðan aðganga að þjónustu í allt að fjóra mánuði.

Markmiðið er að skapa ró og stöðugleika í umhverfi barnsins með farsæld og velgengni þess að leiðarljósi.